ဘဲလေးတွေကြည့်ပြီး စိတ်ကြည့်နူးမှုလေး မပျက်သွားချင်ရင် ဒီပို့စ်ကို ဆက်မဖတ်ပါနဲ့..။
ဘဲမွေးမြူရေးခြံက ဘဲလေးတွေ ရေကျောင်းပြီးလို့ ပြန်တတ်လာတဲ့ မြင်ကွင်လေး အရမ်းချစ်စရာကောင်းလို့ ဗီဒီယိုရိုက်ပြီး တင်ပေးထားတာပါ..။ အပေါ်ယံ မြင်ကွင်းသက်သက်ဆိုရင်တော့ အသံစာစာနဲ့ တိုးဝှေ့သွားနေတဲ့ ဘဲကလေးတွေကြည့်ပြီး စိတ်ချမ်းသာမှုလေး ၊ စိတ်ကြည်နူးမှုလေး ဖြစ်လာတယ်..။
ဘဲလေးတွေကို တစ်နေ့ နှစ်ကြိမ်လောက် အနီးနားက ဆည်မြောင်းရေမှာ ဘဲကျောင်းကြပါတယ်..။ ရေဆင်းတဲ့အချိန်ဆိုလည်း အသံစာစာနဲ့ တိုးဝှေ့ပြီး ရေဆင်းကြတယ်..။ ရေကူးတဲ့ ဘဲလေးတွေက ရေကူး..။ ရေညှိရေမှော်တွေကြားမှာ အစာရှာတဲ့ ဘဲကလေးတွေက ရှာလို့..။ သူတို့ကြည့်ရတာ ပျော်စရာပါပဲ..။
ဘဲကျောင်းပြီးလို့ ပြန်သိမ်းတဲ့အခါကြလည်း ဘဲခြံထဲမှာ အေးအေးဆေးဆေး အစာကောက်တဲ့သူက ကောက် အိပ်တဲ့သူက အိပ်နဲ့ အပူအပင်မရှိသလိုပဲလေ..။
ဒါပေမယ့် စိတ်ကြည်နူးမှုလေးတွေက ခဏပါပဲ..။ သေသေချာချာ တွေးကြည့်မိတော့ ဘဲလေးတွေအတွက် စိတ်မကောင်းဖြစ်မိသွားတယ်..။ လူသားတွေရဲ့မာယာကို သူတို့မသိဘူး..။ အချိန်ကုန်ခံ ဘဲကျောင်းထွက်တာတွေ ၊ အကုန်ကျခံပြီး အစာကျွေးတာတွေက သူတို့အတွက် အန္တရာယ်ရှိမှန်း မသိဘူး..။ အချိန်တန်ရင် သူတို့ရဲ့သွေးသားကို လူသားတွေရဲ့ အာဟာရအတွက် စတေးပေးရမယ် ဆိုတာသိရင် ခုလို ပျော်နိုင်ပါ့မလား..။ အသံစာစာနဲ့ ကျွေးသမျှ အစာကို အလုအယက် စားပါဦးမလား..။ အဲဒါတွေ မသိတော့.. လွတ်မြောက်ဖို့ ကြိုးစားရမှန်းမသိဘဲ ပျော်ပျော်ကြီး နေနိုင်ကြသည်ပေါ့...။
ဘဲကလေးတွေကည့်ပြီး သနားတဲ့စိတ်လေးဖြစ်နေတုန်း ဆက်ပြီးတွေမိတာတစ်ခုကြောင့် စိတ်ထဲ တုန်လှုပ်မိသွားတယ်..။ ဘဲကလေးတွေပျော်သလို ကျွန်တော်တို့လည်း ဒီဘဝကြီးမှာ ပျော်နေကြတာပဲ..။ ဒုက္ခဆင်းရဲတွေနဲ့ ပြည့်နက်နေတဲ့ ဒီဘဝကြီး ၊ တဏှာ ရမ္မက်တွေနဲ့ ခြုံလွှမ်းထားတဲ့ ဒီလောကကြီးမှာ ကျွန်တော်တို့ တွေ ပျော်ပျော်ကြီး ရှင်သန်ချင်နေကြတယ်..။ ဘဲကလေးတွေ သူတို့သွေးသားကို စတေးရသလို ကျွန်တော်တို့လည်း အချိန်တန်ရင် သေမင်းခံတွင်းဝမှာ ကျွန်တော်တို့ ဘဝတွေ စတေး ခံရမှာပဲ..။ ကျွန်တော်တို့မှာ ဘာများငြင်းပိုင်ခွင့်ရှိဦးမှာလဲ...။
ဘဲလေးတွေက သူတို့ရဲ့ အသိဉာဏ်နဲ့ သူတို့ဘဝရဲ့ အဆုံးသတ်ကို မသိနိုင်ပေမယ့် ကျွန်တော်တို့ အသိဉာဏ်ရှိတဲ့လူသားတွေကတော့ ဘဝနောက်ဆုံးကို သေခြင်းနဲ့အဆုံးသတ်မယ်ဆိုတာ သိသိလျက်နဲ့ မေ့နေကြတာဟာ ကျွန်တော် တို့ မမိုက်လွန်းဘူးလား..။ သေခြင်းတရားက မလွတ်မြောက်နိုင်ရင်တောင် သံသရာကလွတ်မြောက်နိုင်မယ့် ရိက္ခာထုတ်ကို ကြိုတင်ဆုဆောင်းဖို့ အချိန်တန်နေပြီ ထင်ရဲ့..။
လောဘ ၊ ဒေါသ ၊ မောဟတွေကြားက ရုန်းထွက်ဖို့ မကြိုးစားဘူးဆိုရင်တော့ ကျွန်တော်တို့ တွေက ဘဲခြံထဲကဘဲကလေးတွေလို သနားစရာသတ္တဝါလေးတွေပါပဲ..။
U Hlaing Kyaw Tun
No comments:
Post a Comment