တိမ်မဲ့ကဗျာ

 အတွေးတွေက ကဗျာဆန်ပေမယ့်

လက်တွေ့မှာတော့ ကာရံတွေမပါခဲ့ဘူး..။

အလှပဆုံးပန်းချီကားတချပ်

ရေးဆွဲဖန်တီးချင်ပေမယ့်လဲ

ငါ့နှလုံးအိမ်မှာ ဆေးရောင်တွေ မစုံတော့ဘူးလေ..။

မှောင်ပိတ်နေတဲ့ ဒီလောကကြီးထဲမှာ

မျှော်လင့်ချက်မဲ့ ရှင်သန်နေရခြင်းက

သေရတာထက် ပိုခက်ခဲတယ်..။

အနာဂတ် စိတ်ကူးအိပ်မက်တွေက

လွဲမှားမှုများစွာနဲ့ ပစ္စုပ္ပန်ကိုရောက်ခဲ့တော့

ခါးသည်းတဲ့ အတိတ်တွေကို မွေးဖွားပေးသွားတယ်..။

တလမ်းသွား အချိန်စက်ဝန်းဘောင်ထဲမှာ

မှားခဲ့သမျှတွေ ပြင်ဆင်ခွင့်မရှိတော့..

နတ်ဆိုးရဲ့ကျိန်စာတွေက 

လှည်းဘီးပမာ ထပ်ကြပ်မကွာလိုက်လို့ပေါ့..။

တိမ်မဲ့ကောင်းကင်အောက်က

ဦးတည်ရာမဲ့ လျှောက်လှမ်းနေရတဲ့ဘဝမှာ

အပူလှိုင်းတွေ ငါ့ကျောမှာစူးစိုက်နေလဲ

အံကြိတ်သည်းခံရုံကလွဲလို့ ဘာများတတ်နိုင်ဦးမှာလဲ..။

ဒီခန္ဓာ မြေမှာတသားတည်းဖြစ်တဲ့တနေ့

ခေတ္တ ဝမ်းနည်းပေးမယ့်သူတယောက်ရှိရင်ပဲ

ငါ..ဒီတဘဝစာအတွက် ကျေနပ်နိုင်ပါပြီလေ..။

Hlaing Kyaw Tun

14.6.2024

ငြိမ်းအေးသူ

 

တပ်မက်လိုအင် စိတ်အစဉ်ကို
ရင်တွင်ပယ်ဖြတ် ငါသတ်မှတ်သည်
"အလောဘသမား" ဖြစ်စေမည်။

ဒေါသမာန်ဝင် စိတ်ရိုင်းဆင်ကို
အစဉ်ချွန်းအုပ် ငါထိန်းချုပ်မည်
"အဒေါသသမား" ဖြစ်စေမည်။

ဒု-သုမကွဲ ဒွိစွဲစိတ်ကို
ရင်သိုမထား ငါပယ်ရှားမည်
"အမောဟသမား" ဖြစ်စေမည်။

လောဘဒေါသ မောဟပယ်ခွာ
နေနိုင်ပါမှ လူ့ရွာလောက
နေခဏမှာ သောကလည်းကင်း
ပူပင်ကင်းကွာ ရင်တွင်းအေးမြ
ငြိမ်းအေးရမည်ငါယုံကြည်
"တိဟိတ်သမား" ဖြစ်စေမည်။

U Hlaing Kyaw Tun (13-4-2022)

လောကဓံ

 

လောကလူ့ ရွာ ဖြစ်စဉ်ခါဝယ်
ချမ်းသာဆင်းရဲ ကောင်းဆိုးတွဲလို့
ကြုံမြဲဧကန် လောကဓံတည့်။

ကောင်းကျိုးချမ်းသာ ပြည့်စုံပါလည်း
ငါပဲတ,ဝ မာန်မထနှင့် ၊
ရှိမျှလုံးစုံ ကံဟောင်းကုန်က
နေ့ညမခံ တဖန်ဆင်းရဲ တွေ့ကြုံမြဲတည့်။

အလားထို့တူ ကံဆိုးကူ၍
အပူသောက ကြုံရတလွဲ
ကြံမြဲမဖြစ် စိတ်မညစ်နှင့် ၊
ဆိုးပြစ်ထိုကံ ကုန်ဆုံးပြန်က
တဖန်ကောင်းကျိုး ပေးရိုးအမှန် မြဲဧကန်တည့်။

ကောင်းလည်းမာန်ချိုး ဆိုးလည်းသည်းခံ
လောကဓံကို ခံ,စံသည့်ခါ
တည်ငြိမ်စွာဖြင့် မေတ္တာပိုင်ခိုင်
ရင်ဆိုင်နိုင်မှ လောကသာယာ
လူ့ပြည်ရွာမှာ နေပါကျိုးနပ် ရှင်သန်အပ်တည့်။

U Hlaing Kyaw Tun (14-4-2022)